Kritetoaniel Bûtenpost stelt ‘Suite Hotel’ út
Algemeen‘Suite Hotel’ fan Neil Simon giet net troch op de sneontejûnen 20 en 27 novimber yn Bûtenpost. Kritetoaniel Bûtenpost hat fanwege it koroanafirus besletten de útfiering út te stellen oant mids jannewaris.
De taskôger sjocht dan ien hotelkeamer, trije ferhalen en acht spilers, der fan út geand dat it koroanafirus dan foldwaande tebek krongen is.
Op it program steane mids jannewaris trije prachtige sênes út ‘Suite Hotel’. De spilers binne: Remco de Poel, Frouke Holtrop, Dagmar Kingma, Dictus Benedictus, Anneke Nieuwenhuis, Jella Kingma, Wiesje Kloosterman en Iebe Boum. Sy litte it publyk genietsje fan trije bysûndere situaasjes dy’t har dus allegearre ôfspylje op ien en deselde keamer yn in lúks hotel.
In ûnferwachte sliepster
Yn de earste sêne sjogge jo it stel Marvin & Milly én in jong frommeske. Marvin en Milly binne nei de sted kaam foar in famyljefeest. Marvin is syn frou foarútgong en hat al in nacht yn it hotel sliept. As hy de oare moarns wekker wurdt fynt, hy in jong frommeske by him yn ‘t bêd. It famke is folslein fan’e wrâld, net wekker te krijen, en frou Milly is op kommendewei. Marvin hat in soad út te lizzen …..
Simon oer út Grikelân
Yn sêne 2 komt it publyk yn’e kunde mei Grace, Djoke en Simon. Aktrise Djoke is mei har assistinte Grace ek delstrutsen yn it hotel. Sy binne yn ôfwachting fan de komst fan Simon. Simon en Djoke wienen in echtpear, mar Simon fûn in oare relaasje en sit al jierren op in Gryks eilân. De reden fan syn kommen nei it hotel blykt mear te wêzen as efkes dach sizze ….
Minke wol (no) net trouwe
Yn de tredde en lêste sêne is it publyk, yn alwer deselde hotelkeamer, by it echtpear Ruurd en Nynke. Hja wrakselje mei harren dochter én breid Minke, dy’t har opsletten hat yn de baaikeamer en net fan doel is om de trouamter op te sykjen. Grutte fraach is oft har oansteande Bonne har wol safier krijt ……
De regy fan dizze trije hotelsênes is yn hannen fan Henk Roskammer en Lodewyk Riedhorst. De oersetting is fan Gurbe Dijkstra.