Jubileum FNP: mear each foar takomst as foar ferline
AlgemeenIt wie de kwestje ‘De Sintrale’ (foar it opwekken fan elektrisiteit) oan de Burgumermar, dy’t rom 60 jier lyn de oanlieding wie foar it oprjochtsjen fan de Fryske Nasjonale Partij (FNP). It jubileum waard saterdei fierd yn iisstadion Thialf, in bytsje letter as de bedoeling wie, fanwege it koroanafirus.
Lykwols stie net it ferline, mar de takomst stie sintraal op it jubileumfeest, 21 jannewaris. It wie fuort ek de kampanjestart foar de ferkiezings foar Provinsjale Steaten en Wetterskip Fryslân. En der wie in sympoasium oer de fierdere takomst. Der waard ek praat oer de fraach oft de FNP oan Twadde Keamerferkiezings meidwaan moat.
René Cuperus
De dei yn iisstadion Thialf op It Hearrenfean sette út ein mei in lêzing fan kultuerhistoarikus René Cuperus fan it Clingendael-ynstitút, oer de takomst fan regio ‘s en regionale partijen. Hoe krije dy lanlik mear ynfloed? Cuperus stippe kânsen en falkûlen oan. Dat Friezen mei minder tefreden binne as it lanlik gemiddelde en oer it generaal justjes sûner, is moai fansels. Mar der binne grinzen. De partij moat neffens Cuperus in antwurd fine op ’e fraach hoe’t de ekonomy stân hâlde kin, ek sûnder Lelyline bygelyks. (Want de FNP is tsjin de Lelyline, sa’t de FNP 60 jier lyn tsjin de Burgumer elektrisiteitssintrale wie).
De omstannichheden om mei te dwaan oan Twadde Keamerferkiezings binne guenstich. It fertrouwen yn ’e lanlike polityk is leech, BBB bewiist dat der ferlet is fan plattelânspartijen en de FNP sels hat mear oanhing as ea. BBB kin neffens Cuperus wolris in wichtige konkurrint wurde fan de FNP. De mooglikheden om wat klear te krijen yn De Haach fia PvdA en CDA binne beheind, omdat dizze tradysjonele partijen gâns ferswakke binne. De lobby-krêft fan Fryslân is op it stuit lyts.
Nije boustiennen
De regio’s soene ek mear ynfloed yn De Haach krije kinne troch de regionale fertsjintwurdiging yn de Earaste Keamer oan te passen. Dêr is dan in oar kiesstelsel foar nedich. Al mei al hat de FNP-kommisje dy’t útsiket hoe’t dielname oan de lanlike ferkiezingen mooglik is, wer nije boustiennen krigen foar har ûndersyk. Oan de ein fan de moarn krigen de oanwêzigen oer de takomst fan de partij fragen foarlein, betocht troch Nynke Hinke Rintjema (ôfdieling Tytsjerksteradiel) en Jouke Jan Postma (ôfdieling Dantumadiel). Ek de antwurden fan de oanwêzige leden wurde brûkt troch de ‘takomstkommisje’.
“Miskien wol de grutste”
Op it jubileumfeest (60 plus 1 jier) trape steatelistlûker Sijbe Knol de kampanje ôf mei in taspraak en de nije kampanjefilm. ‘’Wy sille ien fan de grutte partijen yn PS wurde, miskien wol de grutste’’, sei Knol. Hy rôp de kandidaten foar PS en Wetterskip op it poadium, en ek de kandidaat-senator en alle minsken dy’t meihelpe oan de kampanje. Oan it tal jonge gesichten te sjen, hat de FNP ek op dit mêd takomst.
Fansels seach de partij ek werom op it rike ferline. Middeis waard bistedokter Roel Falkena (1936-2021) út Beetstersweach postúm beneamd as earelid. De Flaamske Nelly Maes priizge Falkena ûnder mear foar syn fûleinige ynset by de oprjochting fan de Europeeske Frije Alliânsje. En EFA-foarsitter- Lorena Lopez de Lacalle sei dat de hjoeddeistige ûntjouwings fan de FNP in grut foarbyld binne foar oare minderheidspartijen.
Oer de hiele dei hinne hawwe der mear as 180 minsken op it feest west.