Gemeente Noardeast-Fryslân stipet streektalen
AlgemeenIt Frysk heart by de ynwenners fan de gemeentde Noardeast-Fryslân. Njonken it Frysk en it Nederlânsk wurde der yn dizze gemeente ek ferskate streektalen praten: it Dokkumersk en it Kollumersk (Stedfrysk). Dêrneist wurdt yn in oantal doarpen Súd-Lauwerslânsk praten. “De ferskillende streektalen meitsje de gemeente unyk en dêrom stipet gemeente Noardeast-Fryslân streektaalprojekten”, dielt de gemeente mei.
Wurkgroep Streektalen
“As gemeente wolle wy kontinu de mooglikheden ûndersykje om neist it Frysk, it Stedfrysk en it Súd-Lauwerslânsk te stypjen en te stimulearjen. Dêrta hawwe wy in wurkgroep gearstald dy’t bestiet út fertsjintwurdigers fan belanghawwende organisaasjes en ynwenners mei ynteresse foar taal. Dy wurkgroep komt jierliks byinoar om projekten te betinken en te stypjen mei har kennis en netwurk.”
Stipe foar projekten
Neist de wurkgroep jout de gemeente ek subsydzje oan projekten dy’t oandacht jouwe oan de streektalen yn de gemeente. Ha jo ek sa’n projekt? De oanfragen kinne dien wurde fia de webside fan de gemeente. Der is maksimaal € 750 per projekt beskikber oant de subsydzjepot leech is. Der binne al inkelde suksesfolle projekten út ein setten.
Keimpe de Krokodil
Studinten fan it ROC Friesland College ha tegearre mei Afûk in oanbod foar restauranten ûntwikkele, besteande út in placemat fol spultsjes en it meartalige lêsboekje ‘Iis foar Eef’ foar de jongste gasten. Allerhanne meartalige spultsjes op in placemat meitsje dat it wachtsjen op it iten moai wurk wurdt. It oanbod is yn it Frysk en yn it Dokkumers en fan dizze wike ôf by ferskate restauranten yn de gemeente te finen.
Grutte Earen
Teatermakker Eline de Vries makket in foarstelling midden yn de streek dêr’t it Súd-Lauwerslânsk sprutsen wurdt. Se hat as tarieding ynterviews hâlden mei bewenners fan de streek en sa kriget de streektaal in plak yn har foarstelling ‘Grutte Earen’. Dit spilet fan 23 oant en mei 25 july neist de ‘Grutte earen’ fan Burum (de satellytskûtels).
Streekdichter
Streekdichter fan Noardeast-Fryslân Geart Tigchelaar fytst 14 dagen troch de gemeente om ynspiraasje op te dwaan foar in lang gedicht: ‘Ballade fan Noardeast’. De ynspiraasje komt foaral fan de ynwenners fan alle doarpen en de stêd Dokkum. Elkenien koe by Geart delkomme en op in soarte fan flipover op syn fytskarke opskriuwe wat hy/sy fynt dat yn it gedicht moat. Hy hat syn tocht yntusken folbrocht en wurket no fierder oan it gedicht.