Sumar stipet Voedselbank Tytsjerksteradiel
AlgemeenSUMAR - Fanôf maaie oant 1 desimber is in groepje fan 12 froulju drok dwaande west mei it naaien fan mûlnoaskapkes. De diaconie fan Kerk Sumar hat it materiaal beskikber stelt, d’r binne mear dan 400 mûlnoaskapkes makke en ferkocht. Fan’e moarn is de cheque mei it prachtige bedrach fan €1731, - oanbean oan Voedselbank Tytsjerksteradiel.
De Voedselbank Tytsjerksteradiel betsjinnet om’e 2 wiken, mei útjefte fan libbensmiddelenpakketten, 55 gesinnen dy’t troch in leech ynkommen wat ekstra stipe nedich binne.
De Voedselbank krijt gjin finansjele bydrage fan de gemeente, draait folledich op frijwilligers en krijt harren produkten en jild fan stipe út de mienskip. Supermerken, bakkers, boeren, bedriuwen, skoallen, ferienings en tsjerken yn gemeente Tytsjerksteradiel en omjouwing drage de Voedselbank in waarm hert ta. Skoallen en jeugdwurkorganisaasjes hâlde wol gau ris in aksje om sa jild of guod ta stipe yn te sammeljen. Essity Sumar, it papyrfabryk, soarget foar húskepapyr en de nedige froulju- en babyprodukten. Supermerken stellen harren oerbleaune produkten en ferrassingsdoazen beskikber.
It opropke om de bon fan de Postcodeloterij by de Voedselbank yn te leverjen soarge foar in grutte stapel vegapakketten. Krystbôle, en oare ta it seizoenhearrende produkten, binne yn de kratten in moaie oanfolling by it breanedige deistige iten. Ierpels, bôle, fruit, fleis, kofje en tee, mar ek in lekker koekje of pûde sjips is te finen yn de romfolde doazen dy’t ôfhelle wurde.