
Berne-opfang IKC de Romte yn Tytsjerk behellet it sertifikaat foar twatalich wurkjen
AlgemeenNeidat de pjutte-opfang (2-4 jier) fan IKC de Romte it sertifikaat behelle hat, hat no ek de berne-opfang (0-4 jier) fan de lokaasje offisjeel it sertifikaat ‘Boartsjendewei in taal derby’ helle. De groepen binne ûnderdiel fan berne-opfang koepel Kinderwoud en sy wurkje mei in taalbelied dêr’t it Nederlânsk en it Frysk bewust omtinken yn it deistige program krije.
Dizze wurkwize stimulearret de twatalige ûntwikkeling foar de jonge bern sa optimaal mooglik.
Feest!
Om ‘t no sawol de pjutte-opfang as de berne-opfang it sertifikaat behelle hawwe, wie it dêrom op 12 septimber 2025 feest op IKC de Romte. Wethâlder Caroline de Pee hat it sertifikaat oerlange, dy ‘t de pjutten sels útpakke mochten. Dernei hat Janneke Brakels der mei har gitaar, tegearre mei de bern fan de opfang en in tal beukers in gesellich feestje fan makke!
Ek de âlden fan de bern, de konsulint fan it SFBO en de pedagogysk profesjonals fan de lokaasje wienen oanwêzich om dit feestlike momint mei-inoar te fieren!
By it sertifisearringstrajekt kriget de berne-opfang fan IKC de Romte yn Tytsjerk begelieding fan it SFBO, kennissintrum meartaligens jonge bern. By it SFBO binne rom 270 bernedeiferbliuwen en pjutte-opfanglokaasjes oansletten en dat oantal groeit noch altyd.
Twatalich wurkjen
Twatalige lokaasjes wurkje mei dúdlike taalôfspraken. De pedagogysk profesjonals brûke konsekwint ien taal. Dêrby soargje sy dat der in grut oanbod is fan de Fryske taal. Dizze wurkwize soarget foar in optimale twatalige ûntwikkeling foar de jonge bern. Op de berne-opfang lokaasje fan IKC de Romte biede de pp’ers harren eigen taal oan. De pp’ers hâlde fêst oan de taal dy’t hja fan hûs út went binne te praten.
Fisitaasjekommisje
Der hat in fisitaasjekommisje yn Tytsjerk west te sjen. Der is sjoen nei it taalbelied, de taalomjouwing, it pedagogysk taalklimaat en it folgjen fan de twatalige ûntwikkeling.
De kommisje skriuwt yn har rapport:
“Yn de kring wurdt der in ferhaaltsje fan Tomke foarlêzen. Elske docht dat ynteraktyf troch fragen te stellen en te ferdúdlikjen. Yn it ferhaaltsje komt in ‘súdwester’ foar. Elske wiist op de plaat nei de hoed fan Tomke en seit: Sjoch dy hoed fan Tomke neame se ek wol in súdwester. De hoed wurdt yn de wetterplasse brûkt as boat. De boat dy sinkt. Ien fan de âldere pjutten begjint dan oer de Titanic dy’t troch midden brekt en sinkt. Elske: “Do bedoelst dy grutte boat de Titanic dy’t brekt en sinkt.” Troch der op yn te gean en te werheljen krije ek de oare bern yn de kring it ferhaal mei.”



















