200 jier Tsjibbe Gearts van der Meulen, Wâldman en Wrâldboarger
AlgemeenMoandei 6 maaie 2024 is it op de dei ôf 200 jier lyn dat Tsjibbe Gearts van der Meulen berne waard oan de Burgumerdaem, yn it hûs njonken herberch De Drie Gekroonde Baarzen yn Burgum. Van der Meulen wie in Fryske folksskriuwer, klokmakker, drukker, redakteur en útjouwer fan de Bergumer Courant.
As oantinken oan it 200ste bertejier bringe Douwe Kootstra en Tsjerk Veenstra op 6 maaie oansteande in programma yn restaurant Het Roodhert yn Burgum.
Bergumer Courant
Tsjibbe Gearts van der Meulen waard klokmakker, omdat syn heit dat ek wie, mar oan de drukkerij en it skriuwen (yn ’t Frysk en ’t Nederlânsk) hie er gâns mear niget. Yn 1878 kaam it Weekblad voor Tietjerksteradeel út. Dit soe letter oergean yn de Bergumer Courant. De drukkerij fan Van der Meulen siet earst oan de Skoalstrjitte, mar waard letter festige oan de Legewei yn it pân fan de lettere drukkerij en boekhannel Doevendans, dy’t ék de Bergumer Courant útjûn hat, oant 1989.
Nachtenlang ûnderweis
Van der Meulen wie in echte folksskriuwer. Hy skreau toanielstikken, kluchten, foardrachten en noch folle mear. Tink oan: ‘Tryntsje Rommelpôt’ en ‘Myn suchten en myn sangen’. Hy waard dêrby ynspirearre troch de Burgumer ûnderwizer en skriuwer Harmen Sytstra (‘Moai sûnder wjergea binne de Wâlden’) en syn freon Waling Dykstra.
Sa binne ek de suksesfolle Winterjûnnenochten ûntstien. Der waard optreden yn doarpssealtsjes troch de hiele provinsje hinne. It selskip wie somtiden hiele nachten ûnderweis.
Grêfkiste
Tsjibbe Gearts, sa’t er bekind waard, kin sjoen wurde as in romantikus, wat nayf en mei in boartlike geast. Moaie anekdoate is dat hy fier foar syn dea al in grêfkiste bestelde en ek wolris yn dy kiste lei. Op 16 maart 1906 is er ferstoarn, hast 82 jier âld. Syn grêf is te finen deunby de tsjerke-yngong fan de Krústsjerke yn Burgum. Njonken sines leit it grêf fan syn frou Grietje Peereboom.
‘Tsjibbe Gearts: in apartenien!’
Ta gelegenheid fan syn 200ste bertedei bringe de betûfte foardragers Tsjerk Veenstra en Douwe Kootstra in kabareteftich program, dat libben en wurk fan Tsjibbe Gearts op ‘e nij yn it ljocht set. It wurdt in boartlike foarstelling, mei anekdoates, koarte dialogen, in literêr kwiske, in priuwke winterjûnenocht en in lytse eksposysje. It inisjatyf foar dizze jûn is fan de Burgumer sjoernalist Jaring de Groot fan Omrop Fryslân, ek âld-redakteur fan Weekblad Actief.
De ynrin op moandei 6 maaie is fan 19.45 oere ôf yn Het Roodhert yn Burgum. It programma begjint om 20.15 oere. Der is mar plak foar sa’n fyftich minsken, dus is yn’t foar opjaan needsaaklik. De tagongspriis fiif euro de persoan. Graach kontant ôfrekkenje! Reservearje kin fia tsjibbegearts@gmail.com
