´Fear yn ´e Broek´ foar tolk Fedde Dijkstra
AlgemeenDe Ried fan de Fryske Beweging hat besletten de saneamde Fear yn ´e Broek dit jier út te rikken oan rjochtbanktolk Fedde Dijkstra út Wurdum. De Ried kent de Fear sûnt 1994 geregeldwei ta oan persoanen of ynstellingen dy’t har tige fertsjinstlik makke hawwe op it mêd fan de Fryske taal en kultuer. De priis sil útrikt wurde op sneon 27 novimber yn it skoft fan de Fedde Schurerlêzing. Dy lêzing is fan 15.00 - 17.00 oere yn de Koperen Tuin yn Ljouwert.
De Ried is fan betinken dat Fedde Dijkstra him as rjochtbanktolk Frysk al jierren tige fertsjinstlik makket om Friezen dy’t yn Fryslân foar de rjochter ferskine, yn de gelegenheid te stellen Frysk te praten. Dat er dat net allinnich as wurk beskôget, mar it ek as in ferantwurdlikheid sjocht om foar dat rjocht fan de Friezen te striden.
‘Krekt 70 jier nei ‘Kneppelfreed’
“Dijkstra is der benammen dit jier, 70 jier nei Kneppelfreed (16 novimber 1951), mei aksjes yn slagge om it rjocht fan Friezen om har memmetaal te brûken foar de rjochter, yn it omtinken te bringen fan de lanlike media en de Haachske politisy”, neffens de Ried.
Mei it each op syn iverjen foar it Frysk yn de rjochtbank is de Ried fan de Fryske Beweging fan betinken dat de Fear yn ’e Broek dit jier oan Fedde Dijkstra takomt. De priis bestiet út in hânmjittich ynkleure, orizjinele linofyk fan byldzjend keunstner Fedde Hoekstra en in oarkonde.
As foarsitter fan de feriening fan gerjochstolken hat Dijkstra de lêste tiid striden foar in (gâns) hegere finânsjele beleanning foar gerjochtstolken. Dijkstra is net allinne tolk Frysk-Nederlânsk, mar ek Dútsk-Nederlânsk.
Fedde Schurerlêzing(en)
De Fedde Schurerlêzing(en) fan sneon 27 novimber steane ek yn it teken fan ‘Kneppelfreed’ en de posysje fan it Frysk, doe en no en yn de takomst. Fedde Schurer wie de haadpersoan fan ‘Kneppelfreed’ op 16 novimber 1951. Doe kaam foaral de behyplike posysje fan it Frysk yn de rjochtseal bleat te lizzen. Dêrnei is de (juridyske) posysje fan it Frysk gâns better wurden, mar neffens de ‘Fryske bewegers’ noch net lykweardich oan dy fan it Hollânsk.