Kaartferkeap iepenloftspul Snakkerbuorren 30 july los
AlgemeenDe keartferkeap foar iepenloftspul ‘Galgen’ yn Snakkerbuorren giet los op freed 30 july om 16.00 oere. Kaarten bestelle kin op iepenloftspulsnakkerbuorren.nl.
‘Galgen’ is in swarte komeedzje oer in famyljebedriuw dat al fjouwer generaasjes galgen (bretels) makket fan de alderheechste kwaliteit. De dagen foarôfgeand oan de útfeart fan âld-direkteur Bouke Helfrich komme inkele tsjustere saken oan it ljocht, oer de ferstoarne en oer it bedriuw. Utfeartlieder Tine Schaap docht der alles oan om de útfeart oarderlik ferrinne te litten.
Tradysje opboud
De tekst is fan Sietse de Vries, regisseur is Karin Idzenga. Der wurdt al wakker repetearre yn Snakkerbuorren, in lyts doarpke noardeastlik fan Ljouwert, oan de Dokkumer Ie. It doarpke hat njonkelytsen in tradysje fan iepenloftspullen opboud, mei teksten fan ynwenner Sietse de Vries (sjoernalist en skriuwer).
Tal taskôgers ûnwis
Op dit stuit is noch net dúdlik hoefolle taskôgers yn septimber talitten wurde kinne. Troch in ekstra tribune te pleatsen kinne minimaal 110 taskôgers de foarstellingen bywenje. Sûnder oardel-meter-foarskriften is der plak foar 220 taskôgers. Mochten it der net mear wurde meie as 110, dan is de ferwachting dat de foarstellingen gau útferkocht wêze sille. De foarstellingen binne op 15, 17, 18, 21, 23, 24 en 25 septimber 2021, oanfang 20.00 oere.
Kwekerij waard Doarpstún
De âlde kwekerij efter Oan ‘e Dyk yn it eardere túnkersdoarp Snakkerbuorren hjit no ‘De Doarpstún’. It begûn allegear yn 2001 mei in tal entûsjaste doarpsbewenners/frijwilligers dy’t besleaten de eardere kwekerij op te knappen en mei de bou fan fruit, griente en blommen âlde gloarje ta nij libben te bringen.
Lytse lokaasje
Yn in smûk skaadzjend hoekje fan de tún hawwe dyselde doarpsbewenners yn 2008 it lytste iepenloftteater fan Fryslân makke. Alle betingsten foar in iepenloftspul oer ‘lok’ wiene oanwêzich. Sa hjitte dan ek it earste iepenloftspul. Lok. Dêrnei ûntstie in jierlikse iepenloftspul-tradysje. Sjoch ek: iepenloftspulsnakkerbuorren.nl
Sjoch foar mear ynformaasje oer de Doarpstún op www.dedoarpstun.nl of sjoch ris op de tún sels.
Links (yn it blau) Anja Steegstra yn de rol fan útfeartlieder Tine Schaap - gjin Tine Skiep, sa wol se perfoarst net oansprutsen wurde - rjochts Jelly Krol as har assistinte Akkemyn.