Nynke Duijff-Veenstra út Damwâld winner Grut Frysk Diktee
AlgemeenIt Grut Frysk Diktee 2024 is wûn troch Nynke Duijff-Veenstra fan Damwâld. Mei mar 2,5 flaters wie dat resultaat goed foar it Gouden Dakje. Bysûnder om’t by har in oantal jierren lyn de spiersykte ALS fêststeld is.
Dêrtroch is sy har spraakfermogen sa goed as kwytrekke en ûnderfynt sy hieltyd mear problemen mei bewegen. Dêrom hat sy it diktee yn de Steateseal makke op in spesjale laptop. Tegearre mei har soan Willem Duijff naam sy it gouden dakje yn ûntfangst.
Werom yn de Steateseal
Ekstra bysûnder is dat sy foar it earst sûnt 2021 werom wie yn de Steateseal fan it Provinsjehûs. Dêr hat sy, as notuliste en beliedsmeiwurker fan de griffy, ûngefear hûndert gearkomsten fan Provinsjale Steaten folge. It diktee waard holden op tiisdei 23 april en op Omrop Fryslân-tv útstjoerd op woansdei 24 april.
Twadde waarden Mariska Velstra en Hessel Yntema, tredde Doutsen Jellema en Siegbert de Jong. Der diene fan ‘t jier ek wer fiif teams mei. Dy strieden tsjininoar en dêrby wienen fan de Freonen fan Fryske ynstellingen mei gemiddeld 12,6 flaters it winnende team. Se waarden folge troch de studinten Frysk út Amsterdam (yn trochsneed 26,5 flaters) en it tredde plak wie foar it team fan Harkemase Boys (trochinoar 39,9 flaters).
Waarman Gerrit Hiemstra
De tekst fan it diktee wie skreaun troch waar- en klimaatsaakkundige Gerrit Hiemstra (opgroeid yn Sumar). De titel wie ‘Ofskied fan ‘e winter’. Yn sân alinea’s joech Hiemstra oan dat it klimaat feroaret. As wy dêr wat oan dwaan wolle, dan moatte wy ôfskied nimme fan ús hjoeddeiske libbenswize. Oars sein, der moat in transysje komme, foaral yn it tinken.
De eardere waarman makke de dielnimmers kjel mei wurden as kerbûstich en ûnlijich waar en wurden as eazjende stjalprein. Ek Jûkelburd en Rûchburd, as oantsjuttingen foar Kening Winter, kamen del om de dielnimmers te pleagjen.
Sjuery fan trije minsken
De sjuery bestie út dosinte Frysk Rianne Blokzijl, ûnderwiisadviseur Grietje van der Weg (Cedin) en taalkundige Hindrik Sijens (Fryske Akademy). Dy krigen by it neisjen help fan inkele It Grut Frysk Diktee wurdt om de twa jier organisearre troch de Afûk, it Cedin, de Fryske Akademy, Omrop Fryslân en de Provinsje Fryslân. It wurdt yn ‘e regel hâlden yn de Steateseal. It diktee is werom te sjen fia de webside fan Omrop Fryslân.