It nijste nûmer fan De Nije yn it teken fan muzyk
AlgemeenIt hjerstnûmer 2021 fan it Frysktalige blêd De Nije stiet foaral yn it teken fan – Frysktalige – muzyk. Doe’t de redaksje it skreau, wie noch net wis oft der wer optredens tastien wurde soene, fanwege it koroanafirus. De redaksje hat it der mar op weage.
“Wy wolle graach allegearre wer gewoan sûnder beheiningen fan muzyk genietsje kinne”, skriuwe de einredakteuren Pier Bergsma en Aant Mulder yn harren foaropwurd. Dat liket goed út te pakken: it regear wol mear en mear tastean, sels de 1,5 meter ûnderlinge ôfstân is net mear nedich. Mar dan wol mei faksinaasje of in ‘negative’ testútslach!
Popmuzyk yn Fryslân
Beart Oosterhaven hat yn De Nije as gastredakteur in nijsgjirrich artikel skreaun oer popmuzyk yn Fryslân, fan de jierren sechtich oant en mei 2021. Sjongeres Grytsje Melchers komt oan it wurd nei oanlieding fan har sjongen fan lieten fan Boudewijn de Groot yn it Frysk.
De Fedde Schurerlêzing(en) (sneon 27 novimber 2021) én 70 jier Kneppelfreed (plus de lyknammige téaterfoarstelling yn it Paleis fan Justysje) krije ek rom omtinken.
Gysbert Japiks
Sjongeres Hiske Oosterwijk sjongt lieten fan Gysbert Japiks op de cd ‘Wurden’. Dat is ek oanlieding foar in fraachpetear. Der is ek omtinken foar muzyk yn it Stellingwerfsk, foar draaioargels en tsjerke-oargels en foar Fryske hynders. De bernesiden, de puzel en in petear mei de nije direkteur fan de Fryske Akademy (Nelleke IJssennagger) ûntbrekke likemin.
Elske DeWall
Sjongeres en lietsjeskriuwer Elske DeWall (opgroeid yn Feanwâlden as Elske de Walle) stiet as in diva op ‘e foto en kriget yn in fraachpetear ek it wurd: ‘Muzyk bliuwt in grut part fan myn libben’.
De Nije hat ek wer in oprop foar in ferhalewedstriid, mei as ûnderwerp: eilannen. Losse nûmers binne foar 4,95 euro te keap yn boekhannels, tydskriftewinkels en yn de supermerken fan Poiesz. Sjoch ek: itnijs.frl, foar ynformaasje oer abonneminten. It blêd is in útjefte fan de Ried fan de Fryske Beweging.