Fryske film Stjer aanst ek yn fiif oare talen te sjen
AlgemeenSneon 21 maaie is op Hilgelân (Helgoland) de Dútse premjêre fan de Fryske aksjekomeedzje Stjer. Boppedat ek yn noch fjouwer oare talen. It is ien fan de programma-ûnderdielen fan it 21ste ‘Friesendroapen’ dat fan 20 oant en mei 22 maaie plakfynt op dit eilân yn de Dútske Bocht fan de Noardsee. It is boppedat sechtich jier lyn dat it earste Ynterfryske Friesendroapen dêr foar it earst plakfûn.
De Frysktalige bioskoopfilm fan de band De Hûnekop en regisseur Janko Krist is op 6 septimber 2021 útkaam en wurdt yn opdracht fan de Fryske Rie spesjaal foar dizze gelegenheid fan Dútske ûndertitels foarsjoen troch Geertrui Visser, yn oparbeidzjen mei dr. Claas Riecken fan it Nordfriisk Instituut.
Freedtejûn 20 maaie draait de film ‘Der Krug an der Wiedau’. Dat is de earste Noardfryske film ea. In komyske misdiefilm yn fiif talen: it Noardfrysk, Suderjysk (Súd-Jutlânsk), Platdútsk, Deensk en Dútsk. Dy film is in koproduksje fan it Nordfriisk Teooter yn Husum en de Bund Deutsche Nordschleswiger fan de Dútsktalige minderheid yn Denemarken en regisearre troch Gary Funck. Begjin fan it jier is de film fan Fryske ûndertitels foarsjoen troch Geertrui Visser.
It Ynterfryske liet op muzyk
“Wy bin bûn, ferparte, mar nea oerwûn...” sa begjint it nije Ynterfryske liet wêrfan’t de tekst troch de dielnimmers fan in ‘wurkwinkel’ by it Friesendroapen yn 2019 skreaun waard ûnder begeleiding fan de Fryske folkband Baldrs Draumar. It is no op muzyk set. Dit jier by it Friesendroapen is Baldrs Draumar presint om it nije Ynterfryske Liet foar it earst live nei foaren te bringen. It doel fan it liet is om de ferbining tusken de Fryslannen te beklamjen en te fersterkjen.
Begûn yn 1962
Oan it begjin fan de sechtiger jierren ûntstiene de earste oerwagingen foar in ynterFryske gearkomste foar alle leeftiidsgroepen. Yn 1962 wie it earste treffen op Hilgelân, dat om ‘e trije jier East-, West- en Noard-Friezen yn de betide simmer foar trije dagen nei it offshore-eilân lûkt. Fan 20 oant en mei 22 maaie 2022 is it wer safier. De organisaasje wikselet om de trije jier fan seksje en dit jier is de organisaasje yn hannen fan de Frasche Rädj (Sektion Nord). De Fryske Rie is presint mei sa’n 60 dielnimmers, bygelyks De Fryske Dûnsers.