Frysk diktee Roobolskoallen yn paviljoen MeM
AlgemeenOp in fleurige woansdeitemiddei 20 april 2022 waard de finale fan it Frysk diktee holden foar de Roobol-basisskoallen yn noardeastlik Fryslân. Fan alle skoallen mochten de twa bêste kandidaten meidwaan.
Yn paviljoen MeM by Bûtenpost stie Aant Jelle Soepboer fan Cedin klear om it diktee foar te lêzen. Dêrby waard gebrûk makke fan it boek Silke en MIss Dee fan Baukje Wytsma. De âlders en begelieders koene efkes genietsje fan de sinne, in kopke kofje of tee, en in kuier meitsje op it nije Wâldpikepaad.
Foar trije winners in beker
De bern diene yntusken ferskuorrend harren bêst en nei ôfrin koene ek sy in kuier meitsje op it krekt iepene paad. Underwilens bûgden de sjueryleden harren oer de diktees, dy’t sy sekuer neisjoen hawwe. Dêrnei krigen de folgjende winners in beker:
1. Hanna van Duin fan de Mienskip út Bûtenpost; 2. Bearnd Bos fan de Dr. Theun de Vriesskoalle út Feanwâlden en 3. Jouke Jagersma fan ibs ‘t Pompeblêd út de Westereen.
Boeken foar de bern en foar skoallen
Alle bern krigen it boek ‘Silke en MIss Dee’ kado én de skoallen krigen in pakket Fryske boeken. Ek waarden de sertifikaten útrikt oan de Roobol-learkrêften dy’t meidien hiene oan de kursus KlasseFrysk. De organisaasje sjocht werom op in feestlike middei.