Dûbeltsjok blêd ‘De Nije’ yn teken fan ‘bisten’
AlgemeenIt folslein Frysktalige blêd ‘De Nije’ is krekt wer ferskynd (jiergong 3, nûmer 2). It tema fan dit nûmer is ‘bisten.’ Der stiet in fraachpetear - yn it Frysk - yn mei minister Carola Schouten fan LNV (Landbouw, Natuur en Voedselkwaliteit). Ek is der in fraachpetear mei Menno Brouwer út Burgum, it iennichste Fryske steatelid fan de Partij voor de Dieren yn Fryslân.
Fierder binne der petearen mei Johan de Jong (80 jier, krekt stoppe by Omrop Fryslân-radio) oer goudûlen en de direkteur fan AquaZoo. Boppedat binne de moaiste foto’s fan de fotowedstriid - ek oer bisten - yn dit nûmer opmnommen. De earste priis is foar Anyta Veenema-Talsma út Holwert , mei in (hast hielendal) swart-wite foto fan nijsgjirrige kij.
Oare opfallende ferhalen: Hinke van der Werf út Dearsum oer har dielname oan de ‘Mongol Derby’ - mei hynders troch Mongoalië drave. Joute de Graaf oer stripferhalen oer Ollie B. Bommel, fan Marten Toonder. Ald-Hallumer Ymkje Stienstra, ferbûn oan it UMCG-sikehûs yn Grins, fertelt oer har striid tsjin ynfeksjesyktes.
In pagina oer de restauraasje fan de grêfstien fan Tsjibbe Gearts van der Meulen (1824-1906), ûnder oare redakteur fan de Bergumer Courant. En in petear mei Riekje Grijpstra-Kingma, oer de feemerk fan Ljouwert, dêr’t sy jierrenlang wurke, nei oanlieding fan de ferhuzing nei bedriuweterrein De Hemrik yn Ljouwert. Neffens har miene feekeaplju dat se altyd gelyk hawwe!
Dit dûbeltsjokke nûmer hat 76 siden. ‘De Nije’ ferskynt alle fearnsjierren yn in oplaach fan 1500 eksimplaren. Utjouwer is de Ried fan de Fryske Beweging. De einredaksje wurdt foarme troch Pier Bergsma út Hurdegaryp en Aant Mulder út Balk. Losse nûmers (€ 4,95) binne te keap yn kiosk, boekhannel, tydskriftewinkel en (Poiesz-)supermerken yn Fryslân. De papieren ‘De Nije’ en it digitale It Nijs (www.itnijs.frl) folje inoar oan.